普通記事

平安夜, 打仗夜!

• 終於有d世藝可以出下街玩番下既一日, 回想上年既平安夜已經完全唔記得做過D咩, 應該都係HEA左咁響屋企過, 反觀今年可以同一大班麻甩藉人仕同渡佳節都可謂可喜可賀。
• 朝早俾老豆徵召左落去看舖, 生意太差真係坐足幾粒鐘無黎世藝烏蠅都無隻拍下。一路看舖一路求神拜佛領匯唔好上到市, 如果唔係又加租真係死俾佢睇。
• 失驚無神咁約左kam出黎hea, 兩個方向白痴(我一早已經認左, 係佢唔認)相約既後果就當然係有一個遭殃要行下冤枉路。真係辛苦佢山長水遠咁入黎tuen mun度同我hea。
• 搞左一輪(可憐既ww俾我同kam飛起左...)之後急急忙忙買張飛同一眾麻甩藉人仕(計有老啫, 老暉, 老星, 老鏗, 傑, an達+肥基 )睇功夫。笑位ok好笑, 可惜虎頭蛇尾 --- 尾後周星馳自己打既功夫呃鬼佬都還可以, 比起之前果3個同元華就真係唔多掂...比起少林足球個人覺得差左少少...
• 之後去左旺角打邊爐(大家好似患左tuen mun 恐懼症), 打邊爐少左福仔同yinyeah氣氛真係差d, 無咁好玩 --- 前半部份因個一on9既遊戲(講一句粗口罰款$2)搞到有d靜, 後半飲左d酒猜下枚先好玩d。眾人既話題仍然係果d野( 聽到粉紅姐姐呢個term已經好多千萬次, 究竟幾時有相睇睇?), 當然唔少得每次打邊爐都有既論功行賞咁封軍職 --- 主帥仍然係非老啫莫屬, 其餘新人an達同肥基同中途加入既孖腸同阿堅可謂不成體統!! 要的出去斬!!
• 同場加映:

1. 貌似william hung既waiter;
2. 酒樓高超幕後軍師團;
3. 啤酒妹同兩名麻甩佬;
4. 敵軍撤退既警報聲;
5. 老啫既自動0靚妹仔偵測系統
6. (仍然係)老啫既好學不倦, "夜讀聞西"
7. (仍然仲係)老啫既陰濕"bu之麻打噓"招數
8. (仍然仲更加係)老啫豪邁$10唔駛找連講5句粗口

上述精彩事件老啫8佔其4, 無怪乎佢仍然係眾人foverever既主角/導演/主帥!

• 由於啤酒任飲, 當然係人出酒我出命咁搏命灌(之後都醉足成晚)! 仍然係要嘆一句yinyeah同福仔去矣(聽講福仔去左陪"人妻"所以無黎, 知道詳情既朋友請告之所謂既"人妻"係唔係佢老豆個人妻, 即係佢阿媽), 只有與老星&傑小酌以慰藉聊都可謂聊勝於無。
• 由於之後已經醉醺醺, 淨係記得落左機舖後由旺角行落尖東,中途見到不少賣(?)藝者好有節日氣氛。
• 多謝傑同星仲有老鏗既意見, 不過, 唉, 都係果句, 衰人(呢個term好主觀,可能e+仲衰, anyway)唔易做, 我都下唔定決心做...如果佢係一個泛泛之交都還好,唉唉唉, 順其自然啦
• 仍然係好掛住佢, 行街果陣見到有個女仔好似佢, 幾乎想過去望清楚d...不過諗諗下都應該只係醉酒佬既幻覺...呢d咪叫做犯賤囉。唉, 戒白粉都要食美沙硐啦, 呢d野真係好難一朝一夕, 咁既日子仲有排捱...
• 飲醉酒可以係好舒服可以係好辛苦,唉,當係舒服啦,自己會好過d

posted by 老鏘 @ 4:33 上午